MAAYA RAJJYAM 12

ஆக பெர்முடா முக்கோணம் என்பது குறிப்பிட்ட சில காலத்தில் மாத்திரம் பாரிய அழிவுகளை ஏற்படுத்தி ஆர்ப்பரித்து விட்டு மற்றைய சந்தர்ப்பங்களில் சாதாரண கடற்பகுதியாக அடங்கிவிடுகிறது. இது பற்றி மேற்கொள்ளப்படுகின்ற ஆய்வுகளும் குறிப்பிட்ட சம்பவங்களை மாத்திரம் சுற்றி நிற்க வேண்டிய அவசியமும் காணப்படுகின்றது. எப்போதும் எதுவும் நடக்கும் என்றில்லாமல் எப்போதாவது எது வேண்டுமானாலும் நடக்கலாம் என்று எல்லோரையும் எச்சரிக்கையுடன் பார்க்கவைக்கும் பிரதேசமாக அமைதியாக உள்ளது. திகில்கள் பலவற்றை திரளாக கொண்டிருக்கின்ற இந்தப்பேய் முக்கோணம் பற்றிய கேள்விகளுக்கு பதில்கள் சிலவற்றையாவது தருவதற்கு இடையூறாக அமைவது இந்த மர்ம தேசத்தின் மயான அமைதி என்றால் அது மிகையாகாது.

தடயங்களை பெருமளவில் பெற முடியாமல் போனமை

சிறு குற்றவியல் வழக்குகள் முதல் மாபெரும் அறிவியல் ஆய்வுகள் வரை சாட்சிகளும் தடயங்களும் அவற்றின் வெற்றிகரமான முன்னேற்றத்திற்கு அவசியமாகின்றன. ஒவ்வொரு ஆய்வினதும் தீர்வின் துல்லியத்தன்மையையும் தீர்விற்கான கால அளவையும் தீர்மானிக்கும் இவ்வித்தியாசமான அம்சங்கள் பெர்முடா முக்கோணத்தின் ஆய்வுகளின் போக்கில் தேக்க நிலையை உண்டாக்கும் அளவிற்கு பற்றாக்குறையாகவே காணப்படுகின்றன.

பெர்முடா முக்கோணத்தை பேய் முக்கோணமாக மாற்றிய அனைத்து சம்பவங்களின் போதும் அழிவுகளின் சிதைவுகளும் எச்சங்களும் பெறமுடியாமல் போனது மாபெரும் சவாலாக எழுந்துள்ளது. சம்பவங்களில் நேரடியாக சம்பந்தப்பட்ட அனைவரும் உயிரிழந்தமையும் மிகப்பெரிய கேள்விக்குறியையே தோற்றுவித்துள்ளது. சில சில 2ம் 3ம் நிலை சாட்சிகள் கிடைத்துள்ள போதும் முதல் நிலை சாட்சிகள் கிடைக்காமையானது மர்மங்களை மேலும் கிளறிவிடுவதாகவே அமைகின்றது.

பெர்முடா முக்கோணத்தைப் பொறுத்த வரை அதன் ஆய்வுகளின் போக்கிலான சவால்களுக்கு மட்டுமன்றி உலகளாவிய ரீதியிலான அதன் தனித்துவமாகவும் இந்த பெரிய தடயப்பற்றாக்குறை விளங்குகின்றது. உலகின் பல்வேறு நாடுகளிலும் மேற்கொள்ளப்படுகின்ற ஆய்வுகளின் முடிவுகளின் படி மிகக்குறைவான தடயங்களைக் கொண்டுள்ள ஆய்வுகளில் பெர்முடா முக்கோணம் பற்றிய ஆய்வுகள் முதலிடத்தில் உள்ளது.

தொடரும்...........